Er forsætisráðherrann stikkfrí?

 

Þegar stórir atburðir gerast í stjórnmálum fréttist fátt af Jóhönnu Sigurðardóttur forsætisráðherra nú orðið. Hennar háttur virðist helst vera orðinn sá að láta helst til sín heyra úr vernduðu umhverfi flokksfunda sinna. Þá manar hún flokksfélaganna til dáða, með gömlum kaldastríðs og kreppufrösum. Hins vegar er orðið ljóst að hún veigrar sér við því að takast á við stjórnmálaandstæðinga sína á jafnræðisgrunni; í þingsölum Alþingis þegar stór mál eru á dagskránni.

 

Það gildir auðvitað einu þótt þessi mál séu ekki á beinu málasviði forsætisráðuneytisins. Ætla má að forsætisráðherra vilji mæta til leiks þegar stór mál eru á dagskrá, en skjóti sér ekki undan því að taka slaginn og láti félaga sína um að mæta í eldlínuna.

Það var því auðvitað reginhneyksli að forsætisráðherrann skyldi ekki þora að koma til umræðunnar um hæstaréttardóminn um gengislánin sem við ræddum á Alþingi í gær. Þar var þó um að ræða stórmál; klúður og mistök hennar eigin ríkisstjórnar, sem enginn nokkur maður veit enn þann dag í dag hvað hefur í för með sér.

Hér eru uppi spurningar um að að lög sem ríkisstjórnin hafði forgöngu um, hafi ekki staðist stjórnarskrá. En  forsætisráðherrann segir ekki orð. Það ríkir óvissa um áhrifin á bankakerfið. En forsætisráðherrann er þögull. Það er sagt af flokksfélögum hennar að nú verði að ráðst til atlögu við verðtrygginguna. En forsætisráðherrann sér ekki ástæðu til að tjá sig í umræðunni.

Í dag var hins vegar ríkisstjórnarfundur. Utan hans biðu fréttamennirnir. Forsætisráðherrann átti því ekki undankomuleið og neydist til þess að tjá sig. Hún endurtók orð Steingríms J. Sigfússonar og Árna Páls Árnasonar,  núverandi og fyrrverandi efnahags og viðskiptaráðherra, sem fengu það hlutverk að halda uppi vörnum fyrir ríkisstjórnina í þessu máli.

Og svo var síðdegis í gær rætt um hinar miklu skýrslur um lífeyrissjóðina. Þar sást heldur ekki til forsætisráðherrans. Nýji fjármálaráðherrann flutti skrifaða skýrslu úr ráðuneyti sínu um málið, sagði síðan ekki orð alla umræðuna, en flutti fáein orð í lokin. Það var nú allur bragurinn á málflutningi ríkisstjórnarinnar þegar þessi stóru mál voru rædd.

Athyglisverður var svo hlutur Vinstri grænna í þessum umræðum. Í umræðunum um gengislánadóminn tók bara til máls, í tveimur umræðum, Björn Valur Gíslason úr kjördæmi ráðherrans. Öðrum var besýnilega ekki treyst. Og í umræðunni um lífeyrissjóðina var hinn samþingsmaður Steingríms úr kjördæminu, Þuríður Backmann. Hér var greinilega fylgt reglunni um að leita ekki langt yfir skammt. – Keep it all in the family!

Svona er nú orðið upplitið á ríkisstjórninni þessi dægrin.