Byssurnar skjóta ekki sjálfar

 

Þegar flestir nánustu samstarfsmenn Steingríms J. Sigfússonar formanns VG lýsa því yfir að endurskoða þurfi umsóknina að ESB, þarf ekki að efast um að slíkt er sett fram með vitund og vilja formannsins. Það gildir í þessu það sem haft var eftir Jónasi frá Hriflu forðum tíð: Byssurnar skjóta ekki sjálfar.

Kröfur VG um endurskoðun ESB viðræðna eru auðvitað ekki settar fram án vitundar og vilja formanns flokksins

Þó við blasi öllum að þessi krafa er sett fram í örvæntingu vegna skelfilegrar stöðu VG og reiði flokksmanna vegna svikanna í ESB málinu, þá setur hún málið í nýtt ljós. Hér er í rauninni um að ræða kröfu annars stjórnarflokksins um að stöðva með einhverjum hætti frekari samningaumleitanir við ESB. Er þó aðildarumsóknin að sambandinu ein helsta stoð stjórnarsamstarfsins. Það er því alveg rökrétt hjá Össuri Skarphéðinssyni utanríkisráðherra að segja að málið veki upp spurningar um framhald samstarfsins.

Tveir kostir

En með yfirlýsingum sínum hafa Vinstri grænir líka sett sig í erfiða stöðu. Nú standa þeir frammi fyrir tveimur kostum.

Annar er sá að standa við stóru orðin. Stilla Samfylkingunni upp við vegg og hætta ekki fyrr en samniingaumleitunum við ESB verði slegið á frest, þær settar á ís, eða lagðar endanlega af. Þessu skylt gæti verið að Samfylkingin féllist á þá hugmynd Ögmundar Jónassonar innanríkisráðherra að setja málið í þjóðaratkvæðagreiðslu.

Vandinn við þá leið er auðvitað sá að þingmenn VG og Samfylkingar felldu slíka tillögu í maí lok. En við vitum að þar á bæ eru menn býsna kokvíðir þegar kemur að því að éta ofan í sig kosningaloforðin.

Hinn kosturinn er sá að láta það nægja að ræða við Samfylkinguna um málið án þess að það leiði til lykta samningaviðræðnanna. Sú niðurstaða yrði banabiti fyrir flokkinn. Sú reiði og gremja sem hefur safnast upp hjá flokksmönnum og kjósendum hans er orðin svo megn að undirlægjuháttur af þeim toga yrði að sjálfsögðu ekki liðinn.

Af þessu sést, að þessi herleiðangur VG er flokknum býsna snúinn. Trúverðugleiki hans er auðvitað fyrir löngu fyrir bí. Örvæntingarútspilið núna mun litlu breyta, en gerir það hins vegar að verkum að flokkurinn á þann kost einan að freista þess að hafa samstarfsflokkinn undir að þessu sinni.