Eru ESB-aðildarviðræður átak til atvinnusköpunar?

Seilst er í allar áttir til þess að tína til rök fyrir aðildarumsókn að ESB. Þetta kemur til dæmis fram í nefndaráliti meirihluta utanríkisnefndar Alþingis. Þar er vitnað til mats Utanríkisráðuneytisins á kostnaði vegna aðildarumsóknarinnar og getur þar margt athyglsivert að líta. Sérstaklega er athyglisvert hve ráðuneytið leggur sig fram um að dylja allan kostnaðinn og gera lítið úr honum.

Þrátt fyrir það metur Fjármálaráðuneytið að útlagður kostnaður verði um 1 milljarður króna sem er dálagleg upphæð á erfiðleikatímum.

En ýmislegt annað er nefnt til þess að gylla þetta mál. Þannig segir í áliti Fjármálaráðuneytisins um kostnaðinn sem leiðir af því að fara í aðildarviðræður: "Utanríkisráðuneytið gerir ráð fyrir að það þurfi að ráða 24 þýðendur til viðbótar og að umfang þýðinga sé samtals um 30–50 þúsund blaðsíður."

Þetta er sem sagt enginn smá doðrantur. 50 þúsund blaðsíður af gerðum, tilskipunum og hvers konar laga og reglugerðarverki er örugglega myndarlegur skógur af pappír. Svarar til 100 til 200 binda ritverki, þó spurning sé hversu áhugaverð slík lesning telst.

En skemmtileg eru rök Utanríkisráðuneytisins, sem telur þessa ráðningu á 24 þýðendum, sérstakt fagnaðarefni og virðist líkja þessu við eins konar átak til atvinnusköpunar. Enda segir í áliti Utanríkisráðuneytisins:

"Í því samhengi er rétt að hafa í huga að með þessu verkefni mun skapast atvinna fyrir háskólamenntaða stétt þýðenda en auk þess má nefna að sú staðreynd að ESB mun við mögulega aðild Íslands þurfa á sérhæfðri túlka- og þýðendaþjónustu að halda á íslensku kallar á það að íslenskir háskólar skipuleggi nám á þeim sviðum sem skapa mun aukin tækifæri fyrir tungumálamenntað fólk."

Þetta orðalag er örugglega komið frá sjálfum utanríkisráðherranum Össuri Skarphéðinssyni. Hann var nefnilega til skamms tíma ráðherra byggðamála. Hann þekkir því vel mikilvægi þess að efla fjölþætta atvinnustarfsemi og sér þarna kjörið tækifæri til að auka atvinnusköpunina - fyrir fólk sem er sæmilega mælt á erlendar tungur.